Қирғизистонда 2017 йилги президентлик сайловларида фуқароларни идентификация қилиш учун биометрик ID-карталар ишлатилади. Бу ҳақда 4 декабрда Қирғизистон Социал-демократик партиясининг йиғилишида Қирғизистон давлат рўйхатга олиш хизмати раиси ўринбосари Достон Дўғоев маълум қилди.

Дўғоевнинг айтишича, аҳолининг ягона қайд этиш тизимини яратишни ривожлантириш учун тизимни ривожлантириш концепцияси ишлаб чиқилди. Давлат органлари фойдалана олишлари мумкин бўладиган ягона марказлаштирилган электрон маълумотлар базасини яратиш таклиф қилинмоқда.

“Мисол учун, агар биз электрон хизмат порталини татбиқ қилсак, унда бирор шахс қайд қилиш тизимига кира олади. Шунингдек, оператор, мисол учун паспорт олиш учун барча маълумотларни ўзи топа олади. Ягона электрон тизим ёрдамида фуқаро паспорт олади, 18 ёшга етгандан кейин эса унинг маълумотлари сайловчилар ҳақидаги маълумотлар базасига киритилади. У шу ID-картадан сайлов куни идентификация учун фойдаланиши мумкин бўлади”, деб айтмоқда Дўғоев.

“Биометрик паспортлар хусусида айтадиган бўлсак, унда бу тахминан шундай кўринишда бўлади – менинг бармоқ изларим ID-картадаги чипда сақланади. Сайлов пайтида бармоқ изи менинг паспортимдаги чипдаги бармоқ изим билан солиштирилади. Бу тизимдан ҳозирда бутун дунёда фойдаланилмоқда”, деб қўшимча қилди Дўғоев.