Ўзбекистон Республикаси Ахборот технологиялари ва коммуникацияларини ривожлантириш вазирининг “Телекоммуникация операторлари (провайдерлари)нинг хусусий уй-жой мулкдорларининг ширкатлари билан ўзаро ҳамкорлик қилиш тартиби тўғрисидаги низомни тасдиқлаш ҳақида”ги буйруғи эълон қилинди.

Ҳужжатга биноан, эндиликда телекоммуникация операторлари (провайдерлари) кўп қаватли уй ва турар-жой бинолари томига телекоммуникация воситалари ҳамда иншоотларини жойлаштириш (ўрнатиш), уларга хизмат кўрсатиш ва эксплуатация қилишда хусусий уй-жой мулкдорларининг ширкатлари билан шартнома тузишлари шарт.
Бунда ширкат аъзоларининг эллик фоиздан кўпроғи қарши овоз берса, операторга алоқани таъминлаб берадиган базавий станцияларни ўрнатишга рад жавоби берилади. Қурилмани ўрнатиш учун 30 иш кунидан ошмаган муддат ичида ижозат ёки рад жавоби берилади.

Шунингдек, телекоммуникация воситалари ва иншоотларини монтаж ёки демонтаж қилиш ишлари оқибатида ширкат объектига етказилган шикастланишлар бартараф этилиши, объектнинг йўқолган ёки шакли ўзгарган қисмлари оператор (провайдер)нинг шахсий ҳисобидан тўлиқ тикланиши лозим.