АҚШ президенти лавозимига номзод Хиллари Клинтон АҚШ ва Исроил ўртасидаги муносабатлар “кейинги босқичга” олиб чиқилиши кераклигини айтди, деб хабар бермоқда The Times of Israel нашри. Клинтон бу ҳақда Вашингтондаги анжуманда айтиб ўтди.

Клинтон президент сайловларида ютадиган бўлса, ўз президентлигининг биринчи куниёқ Исроил бош вазири Биньямин Нетаньяхуни Вашингтонга таклиф қилишга ваъда берди. Унинг айтишича, икки давлат ҳарбий соҳада ҳамкорликни жиддий мустаҳкамлаш ва кучайтириш устида иш олиб бориши лозим.

Клинтон араб-исроил муносабатлари ҳақида гапирар экан, бир давлат манфаатлари йўлидагина қарорлар қабул қилиниши янги ихтилофларга олиб келишига ишончи комиллигини айтди.

Клинтон, шунингдек, Исроил ҳукуматининг ҳамма аъзолари ҳам Фаластин миллий маъмурияти раҳбари Маҳмуд Аббосни ҳамкор сифатида кўрмаётганларини айтиб ўтди. Клинтон Аббос ўрнини босадиган яхши номзод йўқлигини, унинг ўрнини фақатгина ИШИДнинг “қора байроғи”гина эгаллаши мумкинлигини айтди.