Самарқанднинг “Қўшчинор” маҳалласида тандирсозлар авлодининг давомчиси ҳисобланган Масеҳжон Насриев истиқомат қилади.
«Правда Востока» нашрининг ёзишича, у ўзининг биринчи тандирини мактабни тамомлаган вақтда тайёрлаган. Уни ўз дўстига совға қилган.

Чинакам уста томонидан ясалган тандир бир неча йиллар давомида эгасига хизмат қилади. Масеҳжоннинг тандири синфдошининг оиласида бир йилча иш беради. Шунда у ҳали тандирчиликнинг нозик сирларини тўлиқ ўзлаштириб олмаганини тушуниб етади. Лой билан ишлаш фақатгина қаттиқ меҳнат ва чидамлиликни эмас, балки уни тайёрлаш бўйича билимларни эгаллашни талаб қилишини англаб етди.

Тандирсозлик ишини пухта ўзлаштирган М.Насриев эндиликда бу ҳунарни ўғли Юсуфжонга ҳам ўргатмоқда. Анъанага кўра, у ҳам илк тандирини яқин дўстига тортиқ қилди.
Бугунги кунда Насриев тандирлари нафақат Ўзбекистон, балки Россия, Америка ва Исроилда ҳам ўз харидорларини топмоқда. Яқингинада эса почта орқали навбатдаги тандир Японига юборилди.