"Сўнгги пайтларда таркибида наркотик ва психотроп моддалари мавжуд бўлган дори воситаларини почта жўнатмалари орқали жўнатиш ҳолатлари ҳам учраб турибди. Тошкент шаҳар божхона бошқармасининг “Бош почтамт” ташқи иқтисодий фаолият божхона пости ходимлари томонидан бу каби ҳолатларнинг олдини олишга қаратилган чора-тадбирлар мунтазам давом эттирилмоқда", дейилади Тошкент шаҳар божхона бошқармаси матбуот хизмати хабарида.

Жумладан, фуқаролар С.Қобилова ва З.Лужина (мақоладаги барча исм-шарифлар ўзгартирилган) номларига Россиядан юборилган почта жўнатмалари амалдаги тартибларга биноан божхона назоратидан ўтказилганда, жўнатмалардаги буюмлар орасида CN-23 шаклидаги божхона декларациясида кўрсатилмаган 500 дона “Феназепам” психотроп таблеткалари борлиги маълум бўлди.

Тошкентда истиқомат қилувчи О.Илёсов номига Германиядан келтирилган почта жўнатмаси божхона кўригидан ўтказилганда эса унда тегишли ҳужжатларда қайд қилинмаган 200 дона психотроп таблеткалар борлиги аниқланди.

Шунингдек, Исроилдан фуқаро У.Тўхтаев номига юборилган почта жўнатмасидаги буюмлар орасида таркибида кодеин фосфат гиёҳванд моддаси мавжуд бўлган 140 дона “Рокасет” номли таблеткалар яширилганлиги фош бўлди.

Ҳозирда мазкур ҳолатлар юзасидан божхона текширувлари ва суриштирув ҳаракатлари олиб борилмоқда.

Эслатиб ўтамиз, Ўзбекистон Республикаси Вазирлар Маҳкамасининг 2015 йил 12 ноябрдаги “Гиёҳвандлик воситалари, психотроп моддалар ва прекурсорларни Ўзбекистон Республикаси ҳудудига олиб кириш, ундан олиб чиқиш ва транзит тарзида ўтказиш тартибини, шунингдек уларнинг муомалада бўлиши юзасидан назоратни такомиллаштириш тўғрисида”ги 330-сонли қарори билан Ўзбекистон Республикаси божхона чегарасидан олиб ўтилиши, муомалага киритилиши тақиқланган ва чегараланган психотроп ҳамда наркотик воситалар рўйхати тасдиқланган.

Фуқаролар божхона қоидабузарликлари юзасидан Тошкент шаҳар божхона бошқармасининг 120-76-76 “Ишонч телефони”га қўнғироқ қилишлари мумкин.