Ўзбекистонлик тарихчи ва публицист Шуҳрат Барлоснинг “Туркестан и Южный Кавказ XIX-XX вв. Дашнаки от Ферганы до Карабаха” (Туркистон ва Жанубий Кавказ XIX-XX асрларда. Дашноқлар Фарғонадан Қорабоққача) номли янги китоби нашрдан чиқди. Бу ҳақда Kun.uz таҳририятига муаллифнинг ўзи хабар берди.

Нашр Озарбайжоннинг Тошкентдаги элчихонаси ҳамда Озарбайжон президенти ҳузуридаги Стратегик тадқиқотлар маркази кўмагида амалга оширилди.
Китоб Туркистон ўлкасининг XIX аср охири ва XX аср бошидаги вазият, жадидчилик ҳаракати, чоризм сиёсати, Октябрь инқилоби ҳамда Туркистон мухторияти тарихига бир назардир. Унда асосий ўрин Усмонли ва Россия империялари ҳудудида армани миллатчи ташкилотларининг юзага келиши ҳамда уларнинг террорчилик фаолиятига қаратилади.

Жумладан, дашноқларнинг (Дашнакцутюн партияси) большевиклар билан ҳамкорликда Туркистон мухториятини қулатиши, Қўқонда уюштирилган қирғин, бундан кейин ҳам узоқ давом этган қотилликлар ва ялпи қирғинлар тасвирланади.

Китобда, шунингдек, арман геноциди муаммоси ҳам кўтарилиб чиқади. Муаллиф бу масалага Озарбайжон ва Туркия тарихчиларининг ёндашувини ёқлаб, мазкур концептни танқид остига олади.
Китобнинг асосий адади аллақачон харид қилиниб, Озарбайжоннинг расмий структураларига етказилгани айтилмоқда. Эндиликда китоб бошқа тилларга таржима қилиниши кутилмоқда.

Элдор Асанов тайёрлади