Корея текстиль технологиялари институти делегацияси Тошкентда илк ўзбек-корейс технопарки қурилиши лойиҳасининг батафсил намойишини ўтказди. Бу ҳақда Sputnik Узбекистан хабар бермоқда.

Институт директори Пак Ёнг Хваннинг сўзларига кўра, 2017 йил сўнгига қадар ишга туширилиши режалаштирилган лойиҳанинг умумий қиймати 15 миллион долларни ташкил этади.

“Ушбу маблағлар ҳисобга қурилиш-монтаж ишларини олиб бориш, технологик ускуналарни сотиб олиш ва ўрнатиш, технопаркда ишлаш бўйича ходимларни ўқитишга сарфлаш режалаштирилган. Ўйлайманки, мазкур йўналишдаги ҳамкорлигимиз икки мамлакат енгил саноатида фаолият кўрсатаётган ўзбек ва корейс мутахассисларининг ҳамкорлигини мустаҳкамлайди”, - деди у.

Корейс томони юқори технологияли уч ва беш қаватли маъмурий, шунингдек, қуёш батареялари билан таъминланган, самарали технологияларни қўллаган ҳолда экспериментал ишлаб чиқариш учун мўлжалланган ҳамда ертўлага эга икки қаватли алоҳида бинонинг хомаки режасини тақдим этди.

Комплекснинг умумий майдони 10 минг квадрат метрни ташкил этади. Режага мувофиқ, уч қаватли корпуснинг 4 минг квадрат метрдан зиёд ҳудудида ўқув хоналари, анжуман заллари, кўргазма бинолари, лабораториялар, идоралар, оранжерея (бино ичидаги сунъий экотизим) ва бошқа объектлар ўрин эгаллайди. Илмий-тадқиқот лабораторияси 1,5 минг квадрат метр майдонни эгаллаган икки қаватли бинодан жой олади. Бу ерга тўқув, бўяш-безак бериш, тикув дастгоҳлари ўрнатилади.

Технопаркда республикадаги текстиль муассасалари билан яқин алоқада фаолият кўрсатувчи дизайн-гуруҳлар ҳам иш олиб боради. Бундай ҳамкорликдан кўзланган мақсад янги маҳсулотлар турлари ва дизайнерлик ғояларини ишлаб чиқиш ва уларни амалга оширишни йўлга қўйишдан иборат.