Бугунги кунга келиб дунёдаги меҳнат муҳожирлари сони 150 миллиондан ортиқни ташкил этади. БМТнинг махсус бўлими Халқаро меҳнат ташкилоти ҳисоботида қайд этилишича, меҳнат муҳожирларини қабул қилаётган давлатлардаги муҳожирларнинг иш бажариш улуши ўша мамлакатлар аҳолиси улушидан ортади.

"Меҳнат муҳожирлари сони 150,3 миллион нафарга етган (муҳожирларнинг умумий сони 232 млн). Улардан 83,7 млн нафари эркаклар, 66,6 млн нафари эса аёллар.

Меҳнат муҳожирларининг уларни қабул қилган мамлакатлардаги ишчи қатламидаги улуши ортган: 72,7 фоизи муҳожирлар, 63,9 фоизи маҳаллий аҳоли", дейилади ҳисоботда.

"Бу текширувлар шуни кўрсатадики, муҳожирларнинг аксар қисми ўз ватанини бошқа юртлардаги қулай шароитлар туфайли тарк этади", дейди Халқаро меҳнат ташкилотининг департаменти директори Мануэла Томеи.

Тадқиқот натижаларига кўра, меҳнат муҳожирларининг асосий қисми (106,8 млн) хизмат кўрсатиш соҳаларида ишлайди. 26,7 млн нафар меҳнат муҳожири эса саноат ва қурилиш соҳасида, 16,7 млн киши қишлоқ хўжалиги соҳасида фаолият кўрсатади. Меҳнат муҳожирларининг 48,5 фоизлик қисми Шимолий Америка ва Европа ҳудудига тўғри келади.