Янги 2016 йил яқинлашаётган экан, кўпчилик ўтган йилни сарҳисоб қилиб, навбатдаги босқични бошлаб олишни истайди, бунинг учун эса кейинги йил учун режалар тузиб олишни мақбул йўл деб билади. “Даракчи” нашри Ўзбекистон шоу-бизнеси намояндалари 2015 йили нимага эришгани, 2016 йилда нималарни режалаштираётгани билан қизиқиб кўрди.
“2015 йил ижодимда ҳам, оилам учун ҳам баракали келди, - дейди хонанда Ҳосила Раҳимова. – Қизимни турмушга узатдим. Насиб этса, 2016 йилда яккахон концертимни тақдим этишни, шунингдек, набирамни соғ-саломат бағримга босиб олишни, буви бўлишни ният қиламан”.

DJ Piligrim ҳам 2015 йилнинг омадли келганлигини таъкидлади, лекин 2016 йил режаларини ошкор қилишни истамади.
“2016 йилда... мухлисларимизга атаган ажойиб совҳаларим кўп. Насиб этса, ўз вақтида билиб олишади”, - деб сўзига якун ясади у.
Лекин ҳамма ҳам жорий йилда қўйилган мақсадларига эриша олмаган кўринади. Масалан, Анвар Собиров фильм олиш режаси амалга ошмаганини тан олди.
“2015 йилда фильм суратга олмоқчи эдик. Режага кўра мен унда бош ролни ижро этишим керак эди. Афсуски, бунга бир оз молиявий танқислик сабаб, ниятимизга амалга ошмади”, - деди у.
“2015 йил кириб келиши арафасида учта клип, мусиқий альбом чиқариш, машинамни янгисига алмаштиришни ният қилгандим, - деди Фирдавс N. – Аммо йил бўйи иккита қўшиғимга клип суратга олдим, холос. Машинамни ҳам алмаштира олмадим. Худо хоҳласа, 2016 йилда самарали ижод қилиш, кўпроқ қўшиқ ва клиплар яратишни ният қилганман. 2016 йилда санъатга кириб келганимга 20 йил бўлиши муносабати билан ижодий кеча уюштирмоқчиман”.
Лекин ҳамма ҳам 2015 йилда амалга ошмай қолган ниятлардан воз кечиш ниятида эмас. Актриса Зуҳра Солиева бунга мисол бўла олади.
“2015 йилда она бўлмоқчи эдим, афсуски, бу ниятим амалга ошмади. 2016 йилда она бўлишни режиссёрларимиз мен ҳақимда кино суратга олишларини истардим”, - дея ният қилди у.