Dell компанияси хусусийлаштирилгандан кейин иш ўринларини сақлаб қолишга ваъда берганига қарамасдан, 2015 йил ичида 10 мингга яқин ходимини ишдан бўшатди.

Компания АҚШ қимматли қоғозлар ва биржалар бўйича комиссиясига юборган ўз фаолияти ҳақидаги ҳисоботга кўра, 2015 молиявий йил (январда ёпилган) охирига компанияда тўлиқ кун ишлайдиган ходимлар сони 98,3 минг кишини, бир йил аввал эса бу кўрсаткич 108,3 минг кишини ташкил қилган. Қисқартиришлар сабаби келтирилмаган.

“Биз бир неча мураккаб қарорлар қабул қилдик, улар орасида иш ўринларини қисқартириш ҳам бор эди. Мен айтганимдек, бундай вазиятларда қисқартирилган ходимлар ҳақидаги маълумотларнинг сир сақланишини таъминлаш мақсадида, биз уларнинг сони, бўлинмалар ва ваколатхоналар ҳақида маълумотлар бермаймиз”, деб айтди компания вакили Дэвид Фринк Austin Business Journal нашрига.

Компаниянинг асосчиси ва бош директори Майкл Делл ва унинг инвестицион ҳамкори Silver Lake Lake Partners компанияси Dell акцияларини 2013 йилда сотиб олаётиб компания ходимлари сонини қисқартирмаслигини айтган. Уларнинг ўз қарорларини ўзгартиришга нима сабаб бўлгани номаълум. Бунга паст молиявий кўрсаткичлар сабаб бўлган бўлиши мумкинлиги эҳтимоли бор.