2002 йилда Шамил Басаев раҳбарлигидаги террористик гуруҳ Россия пойтахти Москва шаҳридаги “Норд Ост” мюзиклида одамларни гаровга олиш билан биргаликда россиялик таниқли қўшиқчи Филипп Киркоровни ҳам ўлдиришни режалаштиргани маълум бўлди.

Жангарилар режасига кўра, портлаш театр комплексини қўлга олиш вақтида содир бўлиб, шу йўл билан ҳуқуқ-тартибот органлари ходимларини бўлиб юбориш ва Москва аҳолиси ўртасида ваҳимани келтириб чиқариши лозим эди.

LifeNews маълумотларига кўра, 2002 йилнинг 23 октябрь куни махсус тайёргарликдан ўтган худкуш аёл Заира Даудова Эстрада театри саҳнасига қўлбола гранатани улоқтириши, шундан сўнг металл шарчалар тўлдирилган ўлим нимчасини фаоллаштириши керак бўлган. Филипп Киркоровни ўлдириш учун у биринчи қатордан жой олиши лозим эди. Белгиланган куни Даудовани театрга жангарилардан бири Ахяд Межиев олиб келади.

Аввалига барчаси режага мувофиқ кечган: Даудова ўлим нимчаси ва чўнтагидаги граната билан соқчилар кўригидан ўтиб олган. Бироқ театр ишчилари ундан уяли алоқа телефонини олиб қўйган: 2002 йилда кўплаб моделларда овоз ўчмаган ва гардеробчилар томошабинларни улар билан ичкарига киришларига рухсат бермаган.

Алоқасиз қолган қиз рухсат сигналини қабул қила олмагани сабабли саросимага тушиб қолади. Театрда бир соатча бўлиб, бинодан чиқади ва Ахяд Межидов ўтирган машинага келади. Жангари билан метрода ўзини портлатиши лозим бўлган яна бир худкуш аёл – Айшат Амаева ҳам бўлади. Теракт амалга ошмаганидан сўнг улар Ингушетияга қайтиб кетишади, беш йилча улар ҳақда ҳеч ким ҳеч нарса билмайди. Фақатгина 2007 йилга келиб ҳар иккиси ҳам қўлга олинади.

Унда Заира Даудова режалаштирилган теракт ҳақида ошкор қилган. Бироқ Москвани билмаслиги сабабли теракт “Пушкин” кинотеатрида уюштирилиши режалаштирилганини айтди. Мазкур теракт ҳақидаги маълумотларни чечен терговчилари ўрганмасдан, жиноятдан ихтиёрий воз кечганлик шаклида қайд этишган. Якунда Даудова “Ноқонуний қурол сақлаганлик” айби қўйилиб, суд залида амнистия қилинган. У Бельгияга кетган ва у ерда оила қуриб, фарзандли бўлган. Амаевани ҳам қўлга олишлари билан худкушликка тайёргарлик кўрганлик айбини исботловчи далиллар йўқлиги сабабдан қўйиб юборилган.