Ўзбек киноси тарихида илк маротаба замонавий 4К форматда фильм суратга олинди. “Ўзбеккино” Миллий агентлиги буюртмаси асосида режиссёр Рустам Саъдиев томонидан суратга олинган “Барон” фильмига айни пайтда Magic Pro Production студиясида ранглар жилоси билан сайқал берилмоқда.

Режиссёрнинг Kun.uz мухбирига маълум қилишича, жаҳон стандартларига жавоб берувчи мазкур картина IMAX кинозалларида ҳам намойиш этишга мўлжалланган ҳолда суратга олинди. Тасвирга олиш ишлари 2015 йил май ойларида бошланган бўлиб, сентябрь ойида овозлаштириш ишларига етиб келинди.

Бугунги кунда фильмни рус ва инглиз тилларига ўгириш ишлари ҳам жадаллик билан олиб борилмоқда. “Барон” премьераси 2016 йилнинг бошида бўлиб ўтиши режалаштирилган. 

Эслатиб ўтамиз, мазкур картинада "Кариб денгизи қароқчилари", "Муқаддас замин" каби Голливуд фильмларидаги иштироки орқали танилган актёр Гассан Массуд бош ролни ижро этиш учун таклиф этилган.

Режиссёр Рустам Саъдиев билан бўлиб ўтган интервьюнинг тўлиқ матни яқин соатларда эътиборингизга ҳавола этилади.