“Ўзпахтасаноатэкспорт” холдинг компанияси Ҳиндистондаги халқаро пахта конференцияси доирасида тақдимот ўтказди. Мумбай шаҳрида ўтган Пахта бўйича халқаро консультатив қўмитанинг 74-пленар йиғилишида иштирок этган Ўзбекистон вакиллари ушбу тадбирни амалга оширишди.

Йиғилиш чоғида “Ўзпахтасаноатэкспорт” ХК бошқаруви раиси Акмал Камолов иштирокчиларга Ўзбекистоннинг ривожланиши ҳамда пахта саноатининг тараққиёти, соҳада кузатилаётган ўзгаришлар борасида бохабар қилди.
Тақдимотда асосий эътибор Ўзбекистонда бирлаштирилган, корпоратив бошқарув методларига асосланган “Ўзпахтасаноатэкспорт”нинг ташкил этилишига ҳамда унда пахта хом ашёсини қабул қилиш, қайта ишлаш, ундан маҳсулот тайёрлаш, пахта бўйича илмий тадқиқотлар ўтказиш борасида амалга оширилаётган ишлар билан иштирокчиларни яқиндан таништиришга қаратилди.

“Жаҳон” ахборот агентлигининг маълум қилишича, тақдимот иштирокчиларда катта тассурот қолдирган. Улардан бир қанчаси агентлик билан суҳбат қуриб, ўз таассуротлари билан ўртоқлашган.

“Ўзбекистонда ўтказилаётган илмий ишланмалар жуда долзарб ва замонавийдир, - дейди Ҳиндистон қишлоқ хўжалиги тадқиқотлари институти директори профессор К. Бансал. – Республика дунёдаги энг йирик пахта гермоплазмаси коллекцияси соҳибидир. Биз мамлакатингизнинг бошқа давлатлар билан тенг ҳуқуқлар асосида ресурс алмашиш борасидаги бошланмаларини қўллаб-қувватлаймиз”.