Европа ташкилотлари консорциуми 2016 йил бошида Ўзбекистон қишлоқ хўжалигини Ғарбнинг илғор технологиялари ва илмий янгиликлари ҳисобига модернизация қилиш лойиҳасини бошлайди. Бу ҳақда Франция элчихонаси тарқатган маълумотларда хабар қилинди.

Германия халқаро ҳамкорлик жамияти бошчилигидаги консорциум таркибига Франциянинг Adecia нотижорат ташкилоти, Италиянинг AIA ва Болгариянинг CEED компаниялари кирди.

“Умумий қиймати 9.3 млн евро бўлган лойиҳа икки асосий йўналишда реализация қилинади – чорвачилик ва боғдорчилик. У 2018 йил охиригача давом этиб, Ўзбекистон бозорини Европа қишлоқ хўжалиги товар ва хизматларига очишга ёрдам беради, Ўзбекистон фермер хўжаликларининг Франциянинг ноу-хау ва технологияларига йўлини очади”, - деди Франциянинг Ўзбекистондаги элчихонаси вакили Sputnik мухбири билан суҳбатда.

Кейинги йилда томонлар лойиҳанинг техник-иқтисодий асосланиши устида ишлашни режалаштирмоқда.
Иккинчи босқичда 2017 ва 2018 йилларда конкрет фермер хўжаликлари ва давлат муассасалари танлаб олиниб, уларга замонавий асбоб-ускуналар хариди ва ветеринария хизматлари сифатини ошириш назорати учун маблағ ажратилади.