Қирғизистон миллий хавфсизлик давлат қўмитаси ходимлари томонидан халқаро террорчилик гуруҳлари аъзоларига тегишли, қурол-аслаҳа ва ўқ-дорилар беркитилган яширин жой аниқланди. Бу ҳақда қўмитанинг жамоатчилик билан алоқалар бўлими маълум қилди.

Яширин жой аввал қўзғатилган жиноий иш доирасида террорчиликка ва диний экстремизмга қарши қаратилган тезкор-қидирув тадбирлари давомида аниқланди. Яширин жой Бишкекнинг Арча-Бешик микротуманидаги турар жой биноларидан бирида топилган. “Яширин жойда Калашников автоматлари ва уларга 400 тадан кўпроқ ўқ топилган. Бу яширин жой 10 декабрда йўқ қилинган, халқаро террорчилик гуруҳларидан бирининг икки аъзосига тегишли бўлгани ва улардан Бишкек ва Чуй вилоятида терактлар амалга оширишда фойдаланилмоқчи бўлингани аниқланди”, дейилмоқда хабарда.

Жорий йил бошидан Қирғизистонда махсус хизматлар ходимлари томонидан бир неча махсус операциялар амалга оширилган, улар давомида террорчилик гуруҳларининг 15 нафарга яқин аъзоси йўқ қилинган ёки қўлга олинган. Жангарилардан катта миқдорда ўқотар қурол, граната ва қўлбола портловчи қурилмалар тортиб олинган.