Истеъмолчилар ҳуқуқларини ҳимоя қилиш жамиятлари Федерацияси ахборот хизмати раҳбари Умида Мансурова истеъмолчилар ҳуқуқларининг бузилиши билан боғлиқ саволларга жавоб берди. Жумладан, сотиб олинган маҳсулот яроқсиз бўлиб чиққанда харидордан ва савдогардан нималар талаб қилиниши, маҳсулот харид қилингани тўғрисидаги чекнинг аҳамияти ҳақида атрофлича маълумот берди.

Аммо, унинг сўзларига қараганда, ресторан ва таммадихоналарда тановул қилинган таомдан соғлиғи ёмонлашганини исботлаш мижоз учун катта қийинчилик туғдиради, шу боис бу ўринда истеъмолчи ҳуқуқларини ҳимоя қилиш қўшимча қийинчиликларга учрайди.

“Бундай ҳолатлар, аввало, кафе ва ошхоналарда санитария-гигиена қоидаларига риоя қилмаслик ёки салатларни тайёрлаш жараёнида унга ишлатиладиган маҳсулотларга яхши ишлов берилмаслик оқибатида келиб чиқиши мумкин, — тушунтирди Мансурова. — Масалани ойдинлаштиришда сиздан тамаддихонада овқатланган вақтингиз, чек қоғозингиз, қандай таомларни тановул қилганингиз ҳақида етарли ва аниқ маълумот талаб этилади”.

“Сиз мурожаат қилган шифокорингиз ташхиси, лаборатория таҳлил хулосалари ҳам керак. Шу билан бирга, тановул қилган овқатингиздан намуна туман санитария-эпидемиология назорат марказида лаборатория кўригидан ўтказилган бўлиши керак. Барча хулосалар ҳақиқатан ҳам шу кафе томонидан тайёрланган овқатнинг сифатсизлигидан соғлиғингизга зиён келтирганини кўрсатса, сизнинг бу борадаги ҳақ-ҳуқуқларингиз, албатта, ҳимоя қилинади”, — хулоса қилди мутахассис.