“Ўзбектелеком” акциядорлик компанияси томонидан мамлакатимизда “Электрон ҳукумат” тизими доирасида оптик толали алоқа линиялари бўйича 1Гбит/с.гача тезликда маълумотлар узатиш имконияти билан идоралараро виртуал хусусий тармоқ (VPN) канали яратиш ишлари олиб борилди.

25 декабрь куни “Ўзбектелеком” АК томонидан ўтказилган матбуот анжуманида маълум қилинишича, вазирлик ва идораларнинг 632та объекти тизимга уланди. Хусусан, Ички ишлар вазирлигининг 210та объектигача 236,4 километрлик оптик толали алоқа линияларини ётқизиш йўли билан ИИВ ички идоравий тармоғини ташкил этиш ишлари амалга оширилди.

Шунингдек, “Умуммиллий таълимий электрон кутубхоналар” ресурсларига улаш мақсадида 702та умумтаълим мактабигача 585 километрлик, 200та касб-ҳунар коллежигача эса 796 километрлик оптик толали алоқа линиялари ётқизилди. Бу эса таълимга АКТни фаол жорий этиш имконини кенгайтирди.