Хитой ҳукумати текширувлар вақтида 2015 йил давомида атроф-муҳитга зарарли чиқиндиларни мунтазам равишда энг максимал даражадан кўпроқ чиқариб келган 17 мингтага яқин корхонани ёпиб қўйди.

Маълумотларга кўра, Хитойнинг миллиондан кўпроқ компанияси текширувдан ўтган. Таъкидланишича, баъзи текширувлар фуқароларнинг илтимоси билан амалга оширилган.

Жорий йилнинг декабрида Пекинда биринчи марта тутун туфайли хавфнинг “қизил” даражаси эълон қилинган. Шу туфайли Хитойда мактаблар ёпилган, қурилиш ишлари тўхтатиб қўйилган. Экологик вазиятни яхшилаш учун Пекин ҳукумати автомобиллар оқимини вақтинчалик 2 баробарга камайтирган. Бироқ қабул қилинган чоралар қисқа муддат таъсир қилган ва шу туфайли декабрь ўртасида Пекинда яна хавфнинг “қизил” даражаси эълон қилинган.

ОАВлар тутуннинг пайдо бўлишига кўмирда ишловчи кўплаб корхоналарнинг чиқиндилари, иситиш тизимлари ҳамда қурилиш чанги сабаб бўлаётганини маълум қилдилар.