Австралиянинг шимолий қисмида кузатилган сув тошқинлари сабабли аҳоли оммавий эвакуация қилиш бошланди, йўллар бекитилган бўлиб, тимсоҳларнинг ҳужумлари тўғрисида хабарлар тарқалмоқда. Бу ҳақда 28 декабрь куни The New Zealand Herald нашри маълум қилди.

Тинимсиз ёққан муссон ёмғирлари сабабли Дэйли дарёси сатҳи кўтарилиб, шу номдаги коммунани сув босган. Бу ердан Дарвин шаҳрига 500 киши эвакуация қилинган, уларнинг 390 нафари кўргазма комплексига жойлаштирилган. Ҳозирга қадар бир кишининг табиий офат қурбони бўлгани хабар қилинди. Яна бир киши бедарак йўқолган, деб ҳисобланмоқда. The Guardian нашрининг маълум қилишича, 28 ёшли эркак йўқолган, уни қидиришга вертолёт жалб этилган.

Шу билан бирга, етиб бориш қийин бўлган Науию аҳоли пунктида тимсоҳларнинг пайдо бўлгани айтилмоқда. Бир неча йиртқич маҳаллий футбол майдонига кириб олган бўлса, яна бирини иккита итни еб турганда кўришган.

Шу муносабат билан Шимолий ҳудудларда парклар ва ёввойи табиат ҳаётини сақлаш бўйича комиссия Facebook`даги саҳифасида одамларни огоҳ бўлишга чақирди.
“Рождество ва Янги йилда тимсоҳлардан эҳтиёт бўлинг, сувга беш метрдан ортиқ яқинлашманг, тимсоҳлар Шимолий ҳудудлардаги ҳар қандай сув ҳавзасида бўлиши мумкинлигини унутманг. Сиз уларни кўрмаслигингиз мумкин, лекин улар сизни эмас!” – дейилади хабарда.
Метеорологларнинг башоратига кўра, вазият яқин кунларда барқарорлашади ва шундан сўнг эвакуация қилинганлар ўз уйларига қайтишлари мумкин.