Шри-Ланка президенти Майтрипала Сирисена мамлакат пойтахти Коломбо шаҳрида таниқли қўшиқчи Энрике Иглесиаснинг концертини ташкиллаштирганлар жиддий жазоланиши кераклигини билдирди. У бунинг учун Ўрта асрларда қўлланилган дарра уриш усулини таклиф қилган. Бу ҳақда The Independent нашри хабар тарқатди.

Испаниялик қўшиқчининг концерти 20 декабрь куни Коломбо шаҳридаги регби учун мўлжалланган стадионда бўлиб ўтган. Давлат раҳбарининг норозилигига концерт вақтида қўшиқчининг мухлислари ўзини тутишлари ёқмаган: улар кийимларини ечиб, ўз кумирларига қарата улоқтиришган ва унга ҳаводан бўсалар йўллашган.

"Бу бориб турган қолоқлик ва бундай ҳаракатлар бизнинг миллий анъаналаримизга хос эмас", дейди президент. У бундай мухлисаларни ҳам жазолаш кераклигини таъкидлаб ўтган.

У шунингдек, концерт учун чипталар баҳоси (5000 рупийдан 50 минг рупийгача, бу тахминан 35 доллардан 350 долларгача дегани) ҳаддан ташқари қимматлигига эътибор қаратган.

Бу концерт Иглесиаснинг дунё бўйлаб уюштираётган турнеси давомида ўтказилган. Коломбодаги концерт ташкилотчилари ҳозирча президентнинг фикрларига муносабат билдиришмаган.