Қорақалпоғистон Республикасининг Қўнғирот туманидаги “Қорақалпоғистон” посёлка фуқаролар йиғини ҳудудидаги “Довуд ота” божхона постининг реконструкция қилиниб, фойдаланишга топширилди. Бу ҳақда ЎзА хабар бермоқда.

“Когоннефтгазэнергосервис” масъулияти чекланган жамияти қурувчилари томонидан таъмирланган иншоот замонавий назорат қурилмалари билан тўлиқ жиҳозланди.

– Бу ерда божхоначилар учун барча қулайликлар яратилган, – дейди Қорақалпоғистон Республикаси божхона бошқармаси катта инспектори Полвон Манғитов. – Енгил ва юк автомашиналарини сканер қилувчи назорат қурилмалари ўрнатилди, божхона пости хизмати фаолияти янада такомиллаштирилди. Илгаригидек узоқ навбат кутиб қолиш ҳолатларига барҳам берилди.

Айни пайтда фуқаролар йиғини ҳудудида божхоначилар учун қурилган 32 хонадонга мўлжалланган кўп қаватли турар жой биносининг фойдаланишга топширилиши соҳа ходимлари учун Янги йил байрамига туҳфа бўлди. 7 миллиард 222 миллион сўмлик қурилиш-монтаж ва ободонлаштириш ишлари бажарилган турар жой биносида яшаш учун барча қулайликлар мавжуд.