«КДБ Банк Ўзбекистон» АЖ электрон оммавий ахборот воситаларида «КДБ Банк Ўзбекистон» АЖ ходими томонидан 2016 йил 1 январдан конверсион карталарга хизмат кўрсатиш шартномалари бекор қилиниши ва ҳисобдаги пуллар миллий валютага ўтказиши ҳақида чоп этилган ахборотни қатъий рад этади. Бу ҳақда банк ўз расмий сайтида эълон қилди.

"Қайд этиш лозимки, конверсион операциялар Ўзбекистон Республикаси Президентининг «Жисмоний шахсларга хорижий валютани сотиш тартибини янада либераллаштириш чора-тадбирлари тўғрисида»ги Қарорига (ПҚ–1914-сон, 2013 йил 30 январь) ҳамда Ўзбекистон Республикаси Марказий банки томонидан тасдиқланган «Ваколатли банкларда жисмоний шахслар билан валюта айирбошлаш операцияларини амалга ошириш тартиби тўғрисидаги Низом»га мувофиқ равишда амалга оширилмоқда.

Қўшимча равишда маълум қиламизки, «КДБ Банк Ўзбекистон АЖ» томонидан 2016 йил 1 январдан конверсион операцияларни амалга ошириш ўрнатилган тартибга асосан давом эттирилади", дейилади раддияда.

Шу тариқа, айрим чет эл ахборот ресурсларида эълон қилинган ахборот тасдиқланмади. Kun.uz таҳририяти мазкур текширилмаган ахборотни олиб, қайтадан чоп этганидан афсусда эканлигини маълум қилади.