Xonanda Kanizaning mashinasiga o‘g‘ri tushdi

Shu yilning aprel oyida konsert dasturi davomida o‘tadigan to‘y marosimiga tayyorgarlik ko‘rayotgan xonanda Kanizaning mashinasiga o‘g‘ri tushdi. Bu haqda Sayyod.com sayti xabar bermoqda.

Aytilishicha, 8 yanvar kechasi Kaniza Toshkentdagi Amaretto Restaurant oldiga o‘zining shaxsiy Porsche Cayenne mashinasini qo‘yib, dugonalari bilan ovqatlanib, soat 21:00larda qaytib chiqqanida, mashinasining orqa tarafidan oynasi sindirilganini ko‘radi.

“Mashinam ichida 2.5-3 mln so‘mlik Cavalli sumkam, 10 ming dollarlik Vertu telefonim, 400 dollarlik Fleur Narcotique atiri, bular hammasi menga sovg‘a qilingandi, va yana qimmatbaho hamyon hamda 300 mingcha so‘mimni o‘g‘irlab ketishdi”, - ma'lumot berdi qo‘shiqchining o‘zi.

Kaniza, shuningdek, mazkur masala yuzasidan militsiya murojaat qilmasligini ma'lum qildi: “Yo‘q, chunki bundan avval xam boshqa mashinalarimdan 4-5 marotaba shunday o‘g‘irlatib qo‘yganimda ularga murojaat qilganimda yordam bera olishmagandi, shu sabab xam yana bexuda yozuv-chizuvlar bilan vaqtimni ketkazmay dedim”.

“Boshqa tarafdan, konsert va to‘yim oldidan bosh-ko‘zimizdan sadaqa dedim, lekin endi bundan buyog‘iga mashinamda hech narsa qoldirmaydigan bo‘ldim. Borgan joyimga kerak bo‘lsa mashinamdagi hamma narsamni ko‘tarib olib kirsam kiramanki, lekin endi boshqa narsa qoldirmayman”, - xulosa qildi xonanda.