Дубай халқаро аэропорти йўловчилар ташиш ҳажми бўйича биринчиликни сақлаб қолди. Бу ҳақда Рейтер агентлиги хабар тарқатган.

Аэропорт вакили маълумотига кўра, янги авиакомпаниялар ва йўналишлар қўшилганидан сўнг 2015 йилда трафик 10,7 фоизга ошган. 2015 йилнинг декабрь ойида бу аэропорт хизматларидан 7,05 миллион йўловчи фойдаланган.

Қайд этилишича, 2015 йилда аэропорт хизматларидан 75 миллион йўловчи фойдаланган ва бу борада Лондондаги Хитроу халқаро аэропорти ортда қолдирилган.

Вакилнинг қўшимча қилишича, айни вақтда янги йўловчи терминали синовдан ўтказилмоқда. Бу лойиҳа учун 1,2 миллиард доллар сарфланган. Терминал йилнинг биринчи чорагида иш бошлаши кутилмоқда.