"Ўзбекистон" нашриёт-матбаа ижодий уйида Гулжаҳон Мардонованинг "Ўзбек халқ қўшиқлари" тўплами нашр этилди. Бу ҳақда Ўзбекистон матбуот ва ахборот агентлиги сайтида хабар қилинди.

Ушбу китобга маданиятимизнинг энг гўзал қирраларидан бири бўлган халқ қўшиқлари киритилган. Булар аллалар (оналар алласи, бувилар алласи), болаларга эркалама айтимлар, ёр-ёрлар, келин саломлар, халқ қўшиқ-ўланлари, чой байтлари, рамазон қўшиқлари ва айтимлардан иборатдир.

Тўпламга киритилган қўшиқларни этнограф, фольклоршунос журналист Гулжаҳон Мардонова тартибга келтирган. Китобнинг яна бир аҳамиятли томони шундаки, унда бутун республикамиз ҳудудини қамраб олган ва ноёблиги билан янада қимматли бўлган қўшиқлар жамланган. Мазкур маънавий хазина шу соҳада илмий изланишлар олиб бораётган тадқиқотчилар, мактаб, академик лицей ва касб-ҳунар коллежлари ўқитувчилари, маънавият тарғиботчилари, маҳалла маслаҳатчилари, хотин-қизлар кенгаши фаоллари, фольклор-этнографик ансамбллар жамоаси ва кенг китобхонлар оммасига мўлжалланган.