БМТ Суриядаги уруш жабрланувчиларга кўмак кўрсатиш масалаларини кўриб чиқиш учун 4 февраль куни очиладиган Лондон конференциясида сурияликлар учун ёрдам сифатида 9 млрд доллар миқдоридаги маблағ йиғиб берилишига умид қилмоқда. Бу ҳақда БМТ бош котиби вакили Фарҳон Ҳақ журналистларга маълум қилган.

"Биз 9 млрд доллар йиғиб беришга чақирамиз. Биламиз, бу кўп. Биз тушунамиз, ҳозирда кўп давлатларда иқтисодий пасайишлар кузатилмоқда. Лекин у ердаги (Суриядаги) кишиларнинг муҳтожлиги ҳам жуда оғир даражага етган", дейди у.

Унинг сўзларига кўра, халқаро ҳамжамият ўз ишини икки йўналишда олиб бормоғи лозим.

"Биринчидан, минтақадаги аҳоли учун инсонпарварлик ёрдамларини молиялаштиришни кучайтиришимиз керак. Иккинчидан эса, минтақадаги нотинч вазиятни бартараф этиш учун музокаралар ўтказилиши керак. Лондондаги конференцияда ва Женева музокараларида асосий масалалар шу бўлади. Биз икки йўналишда ҳам жадал ҳаракатланишимиз зарур", деган бош котиб вакили.

БМТ маълумотларига кўра, Суриядаги уйларини урушлар туфайли ташлаб кетганларга ёрдам кўрсатиш учун 2016 йилда камида 8,4 млрд доллар сарфланиши керак бўлади. Айни вақтга келиб бу миқдорнинг 3,4 млрд долларлик қисими тўпланган.

Бундан олдинроқ, БМТ бош котиби Пан Ги Мун мамлакатларни Сурия халқи тақдирига бефарқ бўлмасликка чақирганди. Лондонда бугун ўтказиладиган конференция ташкилотчилари БМТ, Буюк Британия, Германия, Кувайт ва Норвегия ҳисобланади. Конференция қиролликнинг Кембриж университетида ўтказилади.

БМТ маълумотларига кўра, айни вақтда Суриянинг 18та туманида жами 480 минг киши қамал шароитларида яшамоқда. Уларнинг 274 минг нафарга яқини яшайдиган ҳудудлар Сурия армияси қамалида қолган. 200 мингга яқин суриялик эса ИШИД асоратида, бошқа террорчи гуруҳлар назорати остидаги ҳудудларда 12,5 минг атрофидаги суриялик яшайди. Ўтган йили инсонпарварлик ташкилотлари Сурияда қамалда яшаётганларнинг 5 фоизлик қисмигагина ёрдам етказиб бера олганди.