Ҳиндистоннинг Jet Airways авиакомпанияси раҳбарияти 4 январда Жодхпурдан Мумбайга парвоз қилган самолёт экипажининг 5 аъзосини вақтинчалик парвозлардан четлатди. The Daily Mail нашрининг хабар беришича, ўз вазифасидан вақтинчалик четлатилган борткузатувчилар Болливуд юлдузи Сону Нигамга самолётдаги баланд овозли алоқа тизимидан фойдаланишга рухсат беришган.

Интернетда самолёт йўловчиларидан бири тасвирга олган видео оммалаша бошлагандан кейин борткузатувчиларнинг бу қилмиши аён бўлган ва уларни четлатиш қарори қабул қилинган. Видеода Нигам баланд овозли алоқа тизими орқали куйлаётгани ва баъзи йўловчилар унга жўр бўлаётгани тасвирланган.

"Экипажнинг барча жамоаси воқеанинг тафсилотлари аниқлангунча ва келгусида бортдаги ишларни бажариш қоидаларига амал қилиш мақсадида ахлоқ-тузатиш ўқувидан ўтиш учун ўз мажбуриятларидан четлатилдилар", деб айтдилар компания вакиллари.

Нигам Ҳиндистонда энг юқори ҳақ олувчи артистлардан ҳисобланади.

Бу ҳодиса парвоз пайтида борткузатувчилар ўзларини номақбул тутган биринчи ҳолат эмас. 1 февралда АҚШнинг Delta Air Lines авиакомпанияси стюардессалари парвоз пайтида бир-бири билан муштлашиб кетган. Воқеа самолёт Лос-Анжелесдан Миннеаполисга учиб кетаётганда юз берган. "Хонимлар" муштлашиб кетганлар, учинчи стюардессанинг уларни ажратишга уринишлари бесамар кетган. Оқибатда самолёт Солт‑Лейк‑Ситида режалаштирилмаган қўнишни амалга оширишга мажбур бўлган.