Санкт-Петербург мусулмонлар диний бошқармаси ва Россиянинг Шимоли-ғарбий ҳудуди муфтийси Равиль Панчеев ўз лавозимидан четлатилди. Бунга Панчеевнинг "бу лавозимни эгаллаш учун маънавий-ахлоқий ҳуқуқни йўқотгани" сабаб бўлган.

Россия мусулмонлари марказий диний бошқармаси бошлиғи Талгат Тажуддин фармонида айтилишича, Панчеевнинг истеъфога чиқарилиши ҳақидаги қарор "Панчеев Равил Жафарович ўз онаси билан судлашиши ва уни таҳқирлаши сабабли диний лавозимни эгаллаш учун маънавий-ахлоқий ҳуқуқни йўқотганига асосланиб" қабул қилинган.

"Интерфакс" ахборот агентлигининг маълум қилишича, Панчеевнинг онаси ўғлини қонунни бузиш ва ўз лавозимини суиистеъмол қилишда айблаб унинг устидан судга шикоят аризаси топширган. Бундан ташқари, аёл унинг ўғли ўз рақибларини ва ҳаттоки уни тақиб қилгани ва қўрқитганини айтган. Онанинг айтишича, Панчеев бошчилик қилган масжидда "ёвузлик ҳукм сурган", баъзи диндорлар эса Сурияга ИШИД сафига жўнатилган.

Панчеев ўзига билдирилган айбловларга изоҳ бермаган.