6 февралга ўтар кечаси Тайванда содир бўлган 6,4 магнитудали зилзила туфайли ҳалок бўлганлар сони 7 нафарга етди. Бу ҳақда АВС телеканали Тайнань шаҳри ФВВга асосланиб, хабар тарқатган. Шунингдек, зилзила туфайли жароҳат олганлар сони 380 нафардан ортиқни ташкил қилмоқда.

Шаҳарда вайрон бўлган бинолар харобалари остидан кишиларни қутқариб олиш ишлари давом этмоқда.

Зилзила Тайвань жанубидаги аҳолиси 1,8 млн кишини ташкил этувчи бу шаҳарда 10дан ортиқ бинога жиддий зарар етказди. Шундан 8таси, жумладан битта 17 қаватли, битта 16 қаватли турар жой бинолари бутунлай вайрон бўлган.

Айни вақтда оролда тез юрар поездлар ҳаракати тўхтатилган.

Тайвань ороли аҳолиси сони 23 млн нафарни ташкил этади. Бу орол Тинч океанининг сейсмик ҳаракатлар фаоллашган ҳудудида жойлашган. 1999 йилда оролда 7,6 балли зилзила қайд этилиб, 2400 нафардан ортиқ кишининг ўлимига сабаб бўлганди.