Тошкент вилоятининг Бекобод тумани “Ойбек” фермерлар уюшмаси ҳудудида яшовчи Ў. Шарипованинг 2003 йилда “Бекобобцемент” заводида ишлаган даврида у билан бахтсиз ҳодиса рўй бергани, аммо корхона унга H-1 актини беришдан бош тортгани, етказилган зарар ундирилмагани юзасидан қилган мурожаатига Меҳнат ва аҳолини ижтимоий муҳофаза қилиш вазирининг биринчи ўринбосари Б. Низомов жавоб берди.

Унинг таъкидлашича, аризани ўрганиш давомида ундаги келтирилган фактлар ҳақиқатга мослиги, бахтсиз ҳодиса юзасидан махсус текширув ўтказилмагани маълум бўлган.

“Шу муносабат билан фуқаро Ў. Шарипованинг мурожаатида келтирилган масалаларнинг ечимини топиш, шунингдек, содир бўлган бахтсиз ҳодисани ўрганиш ва аниқлик киритиш мақсадида Тошкент вилояти Меҳнат ва аҳолини ижтимоий муҳофаза қилиш бошқармасига мазкур бахтсиз ҳодисани Ўзбекистон Республикаси Вазирлар Маҳкамасининг 1997 йил 6 июндаги 286-сон қарори билан тасдиқланган “Ишлаб чиқаришдаги бахтсиз ҳодисаларни ва ходимлар саломатлигининг бошқа хил зарарланишини текшириш ва ҳисобга олиш тўғрисида”ги Низомга асосан белгиланган тартибда махсус текшириш ўтказиш юзасидан топшириқ берилди”, - унинг сўзларини келтиради “Даракчи” газетаси.