2016 йилги «Оскар» киномукофоти учун номзодлар биргаликда анъанавий тарзда суратга тушишди. Бу ҳақда People хабар қилган.

Гуруҳ сурати Beverly Hilton меҳмонхонасида ўтказилган махсус қабул вақтида туширилган. Маросимда одатдаги тартибда бу йилги мукофот учун номзодлар, жумладан Леонардо ДиКаприо, Алисия Викандер, Бри Ларсон, Сильвестр Сталлоне, Леди Гага, Женнифер Лоуренс, Мэтт Дэймон каби актёрлар иштирок этишган.

Номзодларга маросим вақтида махсус сертификатлар топширилган.

Қайд этилишича, қабулда Сталлоненинг ҳам бўлиши катта қизиқишларга сабаб бўлган. У ДиКаприо билан бир неча дақиқа давомида суҳбат қурган.

Нашрнинг эслатишича, бу «Оскар» тақдимотини ҳеч ким Сталлоне каби интиқлик билан кутмаяпти. У охирги марта 40 йил олдин мукофот учун номзод бўлганди.