Охирги уч йил ичида биронта ўзбекистонлик спортчида допингга биологик намуналар таҳлили ижобий натижа бермаган, яъни уларда допинг қабул қилиш аниқланмаган.

Айни вақтда допинг синовлардан ҳар йили 50 нафар ўзбекистонлик спортчи ўтади. Жаҳон антидопинг агентлиги қоидаларига кўра, допингга намуна олувчи зобитлар спортчилар ёнига огоҳлантиришсиз келишади ва текширув спортчилар учун кутилмаганда амалга оширилади.

Sputnik нашрининг Ўзбекистон Миллий олимпия қўмитасидаги манбага иқтибос келтирган ҳолда маълум қилишича, охирги уч йил ичида биронта ўзбекистонлик спортчида допингга биологик намуналар таҳлили ижобий натижа бермаган.

Таққослаш учун, Россияда охирги 4 йил ичида допинг қабул қилишда 16 спортчи ушланган. Шунингдек, россиялик енгил ва оғир атлетикачилар ҳам допинг қабул қилиш билан боғлиқ можароларга тушишган.

Енгил атлетика бўйича 2005 ва 2007 йилги жаҳон чемпионатларида турли давлатлардан 28 нафар спортчи тақиқланган воситаларни қабул қилишда қўлга тушган.