БМТ Бош котибининг сиёсий масалалар бўйича ўринбосари Жеффри Фелтманнинг маълум қилишича, ИШИД нефть сотиш орқали даромад орттиришни давом эттирмоқда. У БМТ Хавфсизлик Кенгаши террорчиларни молиявий манбаларига қарши курашиш борасида резолюция қабул қилганига қарамай бу ҳолат сақланиб қолаётгани ҳақида айтган. Унинг баёноти ташкилот сайтида маълум қилинган.

Фелтманнинг қайд этишича, ИШИД ўз тасарруфига олган ҳудудларидаги бошқа табиий бойликларни сотиш, солиқлар йиғиш, молларни мусодара қилиш, ҳудуддаги археологик бойликларни талон-тарож қилиш, гаровдагиларни сотиш, ижтимоий тармоқлар орқали маблағ йиғиш ва бошқа молиявий манбалар орқали маблағ тўплаётгани айтилмоқда.

БМТ маълумотига кўра, 2015 йилда ИШИДнинг нефть сотишдан орттирган даромади 400-500 млн долларни ташкил этган.

БМТ ХК томонидан ўтган йилнинг 17 декабрида жангариларнинг молиявий манбаларига қарши курашиш, бунда активларини музлатиб қўйиш, транзит йўлларини узиб қўйиш, ташкилотга алоқадор гуруҳлар, шахсларга қурол сотишга чек қўйиш борасида резолюция қабул қилинган эди.

Фелтман жангариларга қурол етказиб бериш айнан нефть маҳсулотларини сотиш йўли орқали амалга оширилаётганини таъкидлаган.

Бундан олдинроқ, ИШИД ўз жангарилари учун маошлар миқдорини 2 баробар камайтиргани хабари берилганди.