Ўзбекистон яқин пайтларда меҳнат миграциясини тартибга солишни режалаштирмоқда. Бу ҳақда Sputnik агентлиги ташқи меҳнат миграцияси масалалари бўйича агентликнинг юридик вакили Азиз Иноқовга таянган ҳолда хабар бермоқда.

Унинг сўзларига қараганда, айни пайтда бир неча йўналишларда иш олиб борилмоқда. Хусусан, Япония билан ҳамкорликни кенгайтириш мақсадида Ўзбекистон меҳнат ва аҳолини ижтимоий муҳофаза қилиш ҳамда Япония таълим соҳаси бўйича халқаро ҳамкорлик ташкилоти ўртасида меморандум имзоланган.

Ўзбекистон фуқароларни чиқиб кетиш олдидан ўргатиш ва таълим бериш маркази ҳамда Япониянинг “Уно” корпорацияси биргаликда махсус бўлим яратмоқчи, унда ўзбекистонлик ишчилар Японияга ишга кетишдан олдин малака оширади. Корпорациянинг марказий офисида Ўзбекистон-Япония ахборот маркази яратилган.

Иноқовнинг таъкидлашича, Россия билан меҳнат муҳожирлари ҳуқуқларини ҳимоя қилиш бўйича имзоланган ҳукуматлараро келишув реализацияси доирасида ишчи гуруҳнинг бир қанча йиғилишлари ўтказилган бўлиб, уларда МДҲ давлатларида одамларни тартибли равишда ишга жалб қилиш тизимини яратиш масаласи кўриб чиқилган.

Шунингдек, РФ ҳудудида меҳнат фаолиятини олиб бориш учун Ўзбекистон вакилларини ёллаш бўйича келишув кўриб чиқилмоқда.