Швейцариянинг Nestle компанияси Енгил атлетика федерациялари халқаро ассоциацияси (IAAF) билан ҳомийлик шартномасини бекор қилди. Бунга ташкилотнинг допинг билан боғлиқ можаролар қуршовида қолгани сабаб бўлди.

"Биз ҳисоблаймизки, ортиқ бу ташкилот билан ҳамкорлик имижимизга салбий таъсир кўрсатади. Шу туфайли амалдаги шартномани муддатидан аввал тугатдик", дея компания вакили сўзларидан иқтибос келтиради The Guardian.

Nestle 2012 йилдан буён IAAF ҳомийларидан бири саналиб келинарди. Бу ҳомийлик шартномаси 2017 йилгача тузилганди. Компания ташкилот доирасидаги мусобақаларни ичимлик сувлари ва озиқ-овқат маҳсулотлари билан таъминлаб келган.

Шу йилнинг январида Adidas компанияси ҳам IAAF билан 2020 йилгача амал қилиши керак бўлган ҳамкорлик шартномасини бекор қилганди. Лекин ҳозиргача компания логотипи уюшма сайтидан олиб ташланмаган.

Уюшма атрофидаги можаролар ўтган йилнинг ёзида пайдо бўлганди.

Бутунжаҳон антидопинг агентлиги (WADA) мустақил комиссияси Россияни антидопинг қоидаларини бузишда айблаб, IAAF’га Россия федерацияси фаолиятини тўхтатиш, шунингдек, россиялик енгил атлетикачиларни IAAF шафелигидаги мусобақалар, жумладан, Рио-де-Жанейродаги Олимпиада ўйинларидан четлатишни тавсия қилганди. Августда Ламин Диак IAAF президентлигидан олиниб, унинг ўрнини Себастьян Коу эгаллади.

Ноябрь ойида эса IAAF собиқ президенти Россиядан пора олишда гумонланиб, ҳибс қилинди. Шу вақтда IAAF Россия енгил атлетика федерациясини четлатди. Декабрда Ламин Диак россиялик енгил атлетикачилар допингдан фойдаланганини яшириш учун 1,5 млн евро тўлаганини маълум қилди.

2016 йилнинг 8 февраль кунида 4 мингдан зиёд россиялик енгил атлетикачи, жумладан, Елена Исинбаева IAAF томонидан дисквалификация қилинди.