Жиззах цемент заводи “Олмалиқ кон-металлургия комбинати” акциядорлик жамияти таркибида ташкил этилган ва йилига 350 минг тонна оқ, 760 минг тонна портланд (кулранг) цемент ишлаб чиқариш қувватига эга. Ҳозирги кунда корхонада портландцементнинг 400- ва 500-, оқ цементнинг 600- маркалари ишлаб чиқарилмоқда.

Ўтган йили ишлаб чиқарилган 510 минг 385 тонна цементдан 5,5 минг тонна оқ, 10 минг тонна портландцемент хорижга экспорт қилинган. Жорий йилда цемент ишлаб чиқариш 650 минг тоннага етказиш мўлжалланмоқда. Шунингдек, корхона томонидан ойига ўртача 24 минг 587 кубометр оҳактош ҳам қазиб олинади. Бу ҳақида Жиззах цемент заводининг режалаштириш ва иқтисод бўлими бошлиғи Сирожиддин Қоржовов маълум қилган.

Маълумотларга кўра, Жиззах цемент заводида печлардан кўтарилаётган чанг фильтрда 100 фоиз тутиб қолинади ва маҳсулотга айлантирилади. Бу экологияга салбий таъсирларнинг камайишига ҳам сабаб бўлмоқда.

Ҳозирда табиий, техник, иқтисодий имкониятлар ҳисобга олиниб, корхонада портландцемент ишлаб чиқаришни 1 миллион тоннага етказиш бўйича янги лойиҳа амалга оширилмоқда. Қиймати 35 миллион 800 минг доллар бўлган ушбу лойиҳада белгиланган ишларнинг ҳозиргача 62 фоизи бажарилган. Ушбу лойиҳа амалга ошгач, 100 га яқин янги иш ўрни яратилади.

“Заводда меҳнат қилаётган 700 дан зиёд ишчининг аксарияти Фориш, Ғаллаорол ва Зафаробод туманларидаги касб-ҳунар коллежлари ҳамда Жиззах политехника институтини битирган ёш мутахассислардир”, деб ёзади Ўзбекистон миллий ахборот агентлиги.