Италиялик дарвозабон Жанлуижи Буффон France Football журналхонлари орасида ўтказилган сўровнома натижаларига кўра футбол тарихидаги энг яхши дарвозабон деб топилди. Овоз беришда 24 548 киши иштирок этди.

Буффонга умумий овозларнинг 44 фоизи берилди. 2-ўринни Франция терма жамоасининг собиқ дарвозабони Фабьен Бартез (17 фоиз) эгаллади. 3-ўринни эса "Олтин тўп" олган ягона дарвозабон ҳисобланадиган афсонавий Лев Яшин ва Германия терма жамоасининг собиқ дарвозабони Оливер Кан эгаллади. Уларга 7 фоиздан овоз берилган.

Рўйхатнинг кейинги ўринларидан испаниялик Икер Касильяс ва немис Мануэль Нойер (6 фоиздан), голландиялик Эдвин ван дер Сар (3 фоиз), италиялик Дино Дзофф ва даниялик Петер Шмейхель (2 фоиздан), чехиялик Петр Чех, немис Зепп Майер, инглизлар Гордон Бэнкс ва Питер Шилтон ҳамда испаниялик Рикардо Самора (1 фоиздан) жой олди.

38 ёшли Буффон Италия терма жамоаси сафида жаҳон чемпиони ва Европа чемпионатининг кумуш медали соҳиби, 8 карра Италия чемпиони ва икки карра Чемпионлар Лигаси финалчиси бўлган.