Самарқанд вилоятининг Пастдарғом туманидаги бир қатор қишлоқ шифокорлик пунктлари улар жойлашган биноларнинг қурилиш меъёрларига тўғри келмагани сабабли ўз фаолиятини тўхтатди.

Улар орасида “Мингбоев”, "Янги Равот", "Машъал", "Зарбдор", "Гумбаз" ва бошқа пунктлар бор.

Бугунги кунда барча туман қишлоқ шифокорлик пунктлари "Саломатлик-2" дастури бўйича энг замонавий ускуналар билан жиҳозланган ва малакали тиббий ходимлар билан таъминланган. Бироқ "Самаркандский вестник" нашрининг маълум қилишича, вилоятдаги шифокорлик пунктларининг кўпида электр энергия таъминоти билан боғлиқ муаммолар мавжуд. Шу сабабли таҳлилларни ўз вақтида ўтказиш, асбобларни стериллаш ва эмлаш учун вакциналарни сақлашнинг имкони бўлмаяпти.

Шунингдек, шифокорлик пунктларига сув ва иссиқлик таъминоти узатишда ҳам муаммолар кузатилмоқда. Бу омиллар аҳолига кўрсатиладиган тиббий хизматлар сифатига салбий таъсир кўрсатмоқда.