Россиялик сенатор, Федерация Кенгаши ва Туркманистон Мажлиси ҳамкорлиги гуруҳи раҳбари Вадим Тюльпанов саёҳатчиларга келаётган дам олиш мавсумида Туркия ва Миср ўрнига Туркманистоннинг Каспий денгизи қирғоқларидаги курортларни танлашни тавсия қилди.

Ушбу масала ҳақида Тюльпанов Туркманистон парламенти раиси Акджа Нурбердиева билан Ашхободдаги учрашувда муҳокама қилишган эди.
Туркманистоннинг денгиз бўйида қулай ва чиройли курортлари бор, улар хизмат кўрсатиш ва нарх борасида россиялик саёҳатчилар учун Туркия ва Мисрнинг ўрнини боса олади. Ушбу йўналишни ривожлантириш мақсадида Тюльпанов Туркманистон курортларида дам олиш нияти бўлган россияликлар учун виза режимини соддалаштиришни таклиф қилди.

Россиядан Мисрга парвозларни тўхтатиб туриш ҳақидаги қарорни Владимир Путин 2015 йилнинг 8 ноябрида имзолаган. Бунга 31 октябрь куни «Когалымавиа» компаниясига тегишли Airbus A321 самолётининг авиаҳалокати сабаб бўлганди. Туркия ҳаво ҳарбий кучлари Россиянинг Сурия террористларига қарши курашиш операциясида иштрок этаётган Су-24 бомбардировкачи самолётини уриб туширгач, 2016 йилнинг 1 январидан бошлаб Россия ва Туркия аро чартер рейслар ҳам тақиқланган.