Қозоғистоннинг Оқтобе шаҳридаги 35-сонли мактабда таълим олувчи 7-синф ўқувчисининг онаси шу мактаб ўқитувчиларидан бири унинг фарзандига "кун бермагани" учун ўқитувчи устидан судга шикоят қилди. Аёл ўқитувчидан унинг оиласига етказилган маънавий зарарни қоплашни талаб қилмоқда, деб хабар бермоқда "Рика-ТВ" телеканали.

Ўқувчининг онаси ва ўқитувчи орасида можаро чиққан. Аёлнинг таъкидлашича, у мактаб маъмуриятига ўқитувчи устидан шикоят қилгандан кейин ўқитувчи аламини олиш мақсадида ўқувчисига уй вазифасини бажармаганликни важ қилиб, "икки" баҳо қўйган.

Ўқитувчи баҳони қўяётиб, унга "Тағин онанг директорга шикоят қилиб юрмасин" деб айтган. Онанинг айтишича, унинг фарзанди ўқитувчининг бу гапидан кейин тушкун ҳолатга тушиб қолган.

Ўқитувчининг педагогларга хос бўлмаган ҳаракатлари туфайли ўқувчининг мусиқа мактабидаги ўзлаштириши тушиб кетган.

Она ўқитувчи билан навбатдаги можародан кейин шаҳар прокуратураси ва таълим бўлимига шикоят хати ёзган. Бу шикоятни кўриб чиқиш учун махсус комиссия тузилди. Комиссиянинг йиғилишларидан бирида ўқувчи томонидан ўқитувчиси унга "босим ўтказаётган" ҳолати диктофонга ёзиб олинган аудиоёзув эшитиб кўриш учун тақдим қилган.

Математика фанидан таълим берувчи ўқитувчи бундан кейин ҳам ўқувчисига маънавий босим ўтказаверган. Дарслардан бирида ўқитувчи болани доскага чақириб, бола мисолни ечишда қийналаётганини кўриб, "Диктофонга ёзиб олиш қанақа бўлишини энди билиб оласан", деб қўполлик қилган.

Ўқувчи бундай муносабатдан кейин ўтган йилнинг ноябридан декабригача ҳаттои мактабга боришдан бош тортган. Бироқ уларнинг синфига бошқа ўқитувчи келгач, барчаси тубдан ўзгарди.

Бола онасининг айтишича, унинг фарзанди янги ўқитувчи билан тезда тил топиша олган ва ҳаттоки алгебрага "ишқи тушган". Боланинг мусиқа мактабидаги ўзлаштириши ҳам яхшиланган.

Энди бўлса, она фарзандининг собиқ ўқитувчисидан етказилган маънавий зарар учун миллион танга товон пули талаб қилмоқда.