АҚШнинг Лос-Анжелес шаҳридаги Голливуд пресвитериан шифохонаси 5 февралда унинг компьютер тизимини блоклаб қўйган хакерларга тизимни тиклаш учун 17 минг доллар тўлади. Тизимга кириш 15 февралда тикланди, деб маълум қилди шифохона раҳбари Аллен Стефанек.

Стефанекнинг айтишича, товламачилар талаб қилган пул виртуал валюта – биткоинда тўланди, бу жиноятчиларга аноним қолишга имкон беради. "Бу бизнинг компьютер тизимимиз ва маъмуриятимиз ишини тиклашнинг энг тез ва самарали усули бўлди", деб тан олди Стефанек.

Хакерлар дастлаб 3,6 млн доллар талаб қилишган, бироқ анча камроқ қийматга рози бўлишган.

Ушбу жиноят билан Лос-Анжелес полицияси ва Федерал қидирувлар бюроси шуғулланмоқда. Улар шифохона ходимларига тергов тугамагунча ўз хизмат компьютерларини ёқмасликни ва интернетга ўзларининг шахсий ноутбуклари ва планшетларини компьютер вируслари билан зарарланмаслик учун уламасликни тавсия қилишди. 

Хакерларнинг ҳужуми шифохона ишини фалажлаб қўйди, унинг маъмурияти кўплаб беморларни бошқа шифохоналарга ўтказишга мажбур бўлди. 10 кун давомида беморларнинг маълумотлар базасига, уларнинг касаллик тарихига, электрон почта орқали юборилган таҳлил ва текширишлар натижаларига киришнинг иложи бўлмади. Шунингдек, компьютер томографияси ва шу каби жараёнларни амалга ошириб бўлмаган. 

Ҳуқуқ-тартибот муассасалари хакерлар қандай қилиб шифохона компьютер тизимини фалажлаб қўйганини аниқлай олмадилар.