БМТ Сурия ҳукумати қўшинлари қамалида бўлган бешта шаҳарга энг зарурий буюмларни етказди. Бу ҳақда БМТнинг вакили Ёқуб Ал-Хиллога иқтибос келтирган ҳолда Reuters ахборот агентлиги хабар берди.

Инсонпарварлик ёрдами ўз ичига озиқ-овқат маҳсулотлари, дори-дармонлар, вакциналар ва гигиена буюмларини олган. БМТ вакилининг айтишича, ушбу ёрдам 93 минг кишига мўлжалланган, деб хабар бермоқда AFP агентлиги.

Суриянинг қамалда қолган ҳудудларига инсонпарварлик ёрдами етказиш бўйича келишувга 12 февралда Мюнхенда Сурияни қўллаб-қувватлаш халқаро гуруҳи учрашувида эришилганди. БМТ маълумотларига кўра, Сурияда шошилинч инсонпарварлик ёрдамига 400 мингдан кўпроқ одам муҳтожлик сезмоқда. Бу одамлар Сурия ҳукумат қўшинлари, исёнчилар ва ИШИД жангарилари томонидан қамал қилинган ҳудудларда қолмоқдалар.