АҚШлик реп ижрочи Канье Уэст 53 млн долларлик қарзини тўлай олмаётгани учун унга пул йиғилмоқда. Пулларни GoFundMe сайтига ўтказиш мумкин. Айни вақтда 3,5 минг доллар йиғилган.

Аввалроқ Уэст ўзининг твиттерида 53 млн доллар қарзи борлиги ва Facebook асосчиси Марк Цукербергга "замонамизнинг ва барча вақтларнинг энг буюк артисти" сифатида унга 1 млрд доллар инвестиция қилиш илтимоси билан мурожаат қилган.

Пул йиғилаётган сайт саҳифасида репчи фанатлари ўз кумирларига ёрдам беришни сўрашмоқда. "Унинг 53 млн доллар қарзи бор ва кўринишича, у жуда муҳтожлик сезаётган маблағни Цукербергдан оладиганга ўхшамайди", дейилмоқда хабарда.

Уэстнинг ҳамкасби, яна бир реп ижрочи The Game унга 10 млн доллар беришни таклиф қилди. Бу ҳақда The Source нашри хабар бермоқда. "Мен Марк Цукерберг эмасман, бироқ менда, агар у Дубайга келиб, биз билан парашютдан сакраса, унинг ғояларига инвестиция қилишга 10 млн доллар бор", деб ёзди ўз твиттерида The Game. У
ўйлаб кўриш учун Уэстга бир соат вақт берди. Бироқ The Game жавоб олган-олмагани номаълум.