АҚШ ҳукумати Ғарбий Африкадан учиб келган авиайўловчиларни Эбола вируси чақирган касалликнинг (ЭБЧК) мавжудлигини аниқлашга текширишни тўхтатди. Бу ҳақда 18 февралда АҚШнинг касалликларни назорат қилиш ва профилактикаси бўйича федерал марказлари хабарида маълум қилинди.

"2016 йил 19 февралдан АҚШнинг касалликларни назорат қилиш ва профилактикаси бўйича федерал марказлари ва Миллий хавфсизлик вазирлиги Гвинеяни ЭБЧКдан жабр кўрган давлатлар рўйхатидан чиқарди. Гвинея ЭБЧКдан жабр кўрган давлатлардан охиргиси эди", деб айтилмоқда баёнотда.

Аввалроқ Гвинея, Сьерра-Леоне ва Либериядан келган авиайўловчилар АҚШ аэропортларида вируснинг мавжудлигига махсус текширувдан ўтганлар.

АҚШ миллий хавфсизлик вазири Жей Жонсоннинг айтишича, шу тариқа АҚШнинг касалликларни назорат қилиш ва профилактикаси бўйича федерал марказлари Ғарбий Африкани Эболадан холи ҳудуд деб эълон қилди. Жонсоннинг таъкидлашича, бундай текширувлар киритилгандан кейин охирги 16 ой давомида миллий хавфсизлик вазирлиги мутахассислари Эбола авж олган давлатлардан келган 42 мингдан кўпроқ одамни текширувдан ўтказган. Бу текширувлар доирасида йўловчиларнинг тана ҳарорати ўлчанган ва касаллик аломатларининг мавжудлигига сўровнома ўтказилган.

Жаҳон соғлиқни сақлаш ташкилоти маълумотларига кўра кўра, Эбола вируси эпидемияси оқибатида Ғарбий Африкада 28600 киши касалланган, улардан 11300 нафари вафот этган. Кўпчилик қурбонлар Гвинея, Сьерра-Леоне ва Либерияга тўғри келган. Декабрь охирида ЖССТ Гвинея Эбола вируси тарқалишини тўлиқ тўхтатишга муваффақ бўлганини эълон қилган.