Туркманистоннинг "Туркманнефть" давлат концерни Каспий денгизининг туркман секторида янги конларни ўзлаштириш бўйича режаларни амалга оширмоқчи. Бу ҳудуд катта углеводород захираларига бой, дейилмоқда Туркманистон нефть ва газ вазирлиги берган хабарда.

"Туркманистон нефть-газ соҳасида тарихда биринчи марта нефтчилар углеводородларнинг денгиз захираларини ўзлаштириш бўйича илк қадамларни қўймоқда", дейилмоқда хабарда.

"Шимолий Гўтурдепе" ва "Алтигуи" конларида 10 та бурғилаш қурилмалари ёрдамида чуқур бурғилаш ишлари олиб борилмоқда.

Бурғилаш ишларининг натижалари бу конларнинг катта истиқболга эгалигидан дарак бермоқда.

"Туркманнефть" бу конларда горизонтал ва қия йўналган қудуқларни бурғилаш бўйича ишларни бошлаб юборди.

2015 йилда денгиз қудуғининг муваффақиятли тикланиши натижасида 4 минг метрдан кўпроқ чуқурликда янги нефть қатламлари очилди. Бу ерда кунига 250 тонна нефть берувчи кучли нефть фаввораси олинган, бу концерн томонидан фойдаланиладиган конлардаги ўртача кўрсаткичлардан бир неча баробар кўпроқни ташкил қилади.

Каспий денгизининг туркман шельфи захиралари 12 млрд тонна нефть ва 6,5 трлн куб метр газга баҳоланади. Ўрта ва катта чуқурликлардаги ҳудудлар халқаро тендерга қўйилган.

Айни вақтда "Туркманнефть" томонидан 30 га яқин кондан фойдаланилади, улар турли ўзлаштириш босқичларида бўлган 600 дан кўпроқ нефть, нефть-газ ва газ қатламларини ўз ичига олади.