Ўзбек санъатининг забардаст вакили, Ўзбекистон халқ артисти Шерали Жўраевнинг фарзанди Зоҳиршоҳ Жўраев ўзбек эстрада оламида ўз ўрнини топишга интилаётган ёш хонандалардан бири. Акаси Шоҳжаҳон Жўраевдек таниқли ва фаол бўлмаса-да, у отасига муносиб бўлиш йўлида астойдил ҳаракат қилаяпти.

Зоҳиршоҳ Жўраев “Бекажон” газетасига берган интервьюсида ўзбек шоу-бизнес олами ҳақидаги саволга “Менимча, бизда шоу-бизнес деган оламнинг ўзи йўқ. Дунё даражасидаги шоу-бизнесга етишимизга анча бор. Орада фонограмма, клип олишдаги камчиликлар каби хатоларимиз ҳам бисёр. Сон кўп, сифат йўқ”, деб жавоб берди.

Шунингдек, суҳбат давомида санъаткорлар орасида танишлари бор экани, бироқ яқин дўсти йўқлигини айтиб, барчанинг ижодини кузатиб боришини таъкидлади.

Қўшиқчи ижодидаги бир муддатлик танаффус ҳақида ҳам гапирди: “Кунлар бўлди, санъатдан кўнглим совиди. Ўзимни кўп нарсадан чекладим. Санъатдан, оша-оғайни, танишлардан, турли “ўтириш”лардан ўзимни чекладим. Ҳаммамиз ҳам ғирромликдан “суғурталанмаганмиз”, адолатни баъзан топа олмаймиз. Бу—ҳаёт, кўникиб, тўғри хулоса чиқаришдан бошқа чорамиз йўқ. Бу ҳақиқатлар мени кўп ўйга толдирди. Алломалар сўзлари мағзини чақдим. Демак, биз курашиб яшашимиз, нима бўлса-да, ўз мақсадимизга эришишимиз керак экан...”