Суриядаги мухолифат кучлари халқаро коалиция самолётлари ёрдамида ИШИД жангариларини мамлакат шимоли-шарқидаги Ал-Шадади шаҳридан суриб чиқарган.

Сурияда мухолифат кучларидан бири ҳисобланадиган Сурия демократик армияси бу шаҳарда ва унинг атрофидаги қишлоқларда назоратни қўлган олган.

Ал-Шадади ИШИД учун муҳим стратегик нуқталардан бири бўлгани айтилган. Жангарилар бу ерда логистик марказ ташкил қилишганди.

Бу шаҳар орқали Ироқнинг Мўсул ва Суриядаги Раққа шаҳарларига ёрдам кучлари ҳамда қурол-яроғ етказиб берилган.

Буюк Британиядаги "Инсон ҳуқуқлари бўйича Сурия маркази"да қайд этилишича Ал-Шадади ИШИД учун жиддий йўқотиш бўлди.

Ал-Шададини олиш бўйича жанглар жорий ҳафтанинг пайшанба кунида бошланган. Ўша куни АҚШ бошчилигидаги халқаро коалиция шаҳар устига бомба ёғдиришни бошлаганди.

Ҳуқуқ ҳимоячилари маълумотларига кўра, бу зарбаларнинг бир қисми шаҳарда тинч аҳоли вакиллари истиқомат қиладиган ҳудудга тўғри келган. Бу ҳужум туфайли тинч аҳоли вакилларидан камида 15 киши ҳалок бўлган.