Толибонлар Покистон шимоли-ғарбидаги мактабнинг янги биносини портлатишган. Бу ҳақда Рейтер агентлиги хабар тарқатди.

Жангарилар томонидан маълум қилинишича, Жанубий Вазиристон вилоятидаги бу мактаб давлат маблағи ҳисобидан қурилган ва шунинг учун портлатилиши керак эди.

Бу портлаш натижасида жабрланганлар йўқлиги айтилган. Лекин бу мактаб қурилишида иштирок этган 18 киши ўғирлаб кетилган. Кейинроқ улар ортга қайтарилган.

Портлаш натижасида мактабнинг қизлар таҳсил олган қисми деярли йўқ қилинган, бошқа қисмларда зарарланиш даражаси камроқ бўлган. Бундан ташқари қурилиш техникалари яроқсиз аҳволга келган.

Жанубий Вазиристон "Толибон" таъсирида бўлган қабилалар истиқомат қилувчи вилоят бўлиб, ташкилот бу ҳудудда бутун мамлакат бўйлаб амалга оширадиган ҳаракатларига тайёргарлик кўради. Покистон армияси ва махсус кучлари бу ҳудудда бир неча марта жангариларни бутунлай бартараф этиш учун ҳаракат қилган, лекин бунинг уддасидан чиқмаган.