21 февралда Суриянинг Дамашқ ва Хомс шаҳарларида террорчилар томонидан уюштирилган терактлар оқибатида 177 киши ҳалок бўлди. Бу ҳақда Al Arabiya телеканали маълум қилди.

ИШИД жангарилари Дамашқнинг жанубида жойлашган, асосан шиалар яшайдиган Саид-Зайнаб шаҳридаги "Ас-Садр" госпитали ёнида миналаштирилган автомобилни портлатган. Автомобиль портлатилгандан кейин оломон орасига кирган икки худкуш ҳам ўзини портлатган. Охирги маълумотларга кўра, бу терактда 120 киши ҳалок бўлган, юздан кўпроқ одам жароҳат олган.

Бу терактдан бир неча соат олдин Хомснинг ғарбий қисмида жангарилар иккита автомобилни портлатган. Терактлар шаҳарнинг Аз-Захра туманидаги Ситтин кўчасининг арман даҳасига кираверишдаги қисмида уюштирилган. Автомобиллардан бири маҳаллий университетга талабаларни ташийдиган микроавтобуслар тураргоҳи ёнида портлатилган. Бу терактда 57 киши ҳалок бўлган, ўнлаб одамлар ярадор бўлган, улардан кўпчилиги оғир аҳволда.

Бу терактлар 2011 йилда Сурияда ихтилоф бошлангандан кейин содир этилган энг катта терактлар бўлди.