"Ўзбекистон ҳаво йўллари" миллий авиакомпанияси жорий йилда Боинг 757 ва 767 самолётлари учувчилари учун трёнажер – Fullflight-симулятор харид қилишни режалаштирмоқда, деб маълум қилди авиакомпаниядаги манба Sputnik нашрига.

Янги тренажёр икки турдаги самолётлар учун универсал бўлади, чунки бу самолётлар орасида ўлчамларидан ташқари, бошқа сезиларли фарқлар мавжуд эмас. Авиакомпания раҳбарияти фикрича, бу экипажларни ўқитишда оптимал ва фойдали йўл ҳисобланади. Симулятор самолётларнинг биридан иккинчисига енгил ўзгартирилиши кўзда тутилган.

Аввалроқ авиакомпанияда маълум қилинганидек, харид қилинаётган симулятор аввал фойдаланишда бўлган, чунки ҳозирда Боинглар учун бундай симуляторлар ишлаб чиқарилмайди. Ўз навбатида Канаданинг CAE компанияси авиакомпания буюртмасига кўра бу симуляторни халқаро стандатларга мос модернизация қилади.

Манба фикрича, бу тренажёр авиакомпаниянинг учувчиларни тайёрлаш ва уларнинг малакасини оширишдаги имкониятларини яна оширади. Шу билан бирга компания томонидан амалга ошириладиган парвозларнинг хавфсизлиги ошади. Fullflight-симуляторлар ҳақиқий парвознинг тўлиқ тасвирини яратишга қодир, бу учувчиларнинг турли фавқулодда вазиятларга жавоб бериш малакаларини сайқаллашга имкон беради.

Айни вақтда миллий авиакомпания мунтазам асосда дунёнинг 40 дан кўпроқ шаҳарига рейслар амалга оширади. Компаниянинг 25 та давлатда ваколатхоналари мавжуд.